الرئيسية منوعاتخالتو محاسن تعرف على خالتو محاسن

تعرف على خالتو محاسن

بواسطة Mohammed Ismail
3 تعليقات

نتشرف في الإطلالة الأولى لخالتو محاسن أن نستضيفها في لقاء فريد من نوعه لنتعرف عليها عن قُرب و نتجاذب أطراف الحديث.

*بداية أرحب بك خالتو محاسن و أترك لك المساحة لتعرفينا أكثر عن نفسك تفضلي:

# الله يسلمك ! الله يبارك فيك ياولدي الله يسلمك الله يبارك فيك ليسلمك ليبارك فيك ليسلمك ليبارك فيك … إلخ

#طيب! في البداية، اسمي محاسن جاد الله عسمان (بحرف السين) عشان أنا بحب أكتب اسم جدّي ـ زي ما بيتنطق ـ وأنا زولة حرّة وراكبة راس و سترونق اندبندنت خالة يعني شنو ؟

# يعني ست شاي ! معتمدة علي نفسي وبملك قوتي وقراري، وزولة مواكبة للتكنولوجيا.

*كم ربيعاً تبلغين من العمر؟

# أنا ! عمري عمر الزهور ياولدي، العمر ده بالنسبة لي مجرّد رقم، دي أول حاجة  تمام،  تاني حاجة أنا روحي شبابية، ما عندي إيمان بي إني بقيت عجوزة وكبيرة، فمافي داعي تعرف عمري. عمري ما بيخصّك في حاجة.

*طيب يا خالتو محاسن، قريتي وين ؟

#القُر الينفخك! مالك بي قرايتي؟ أنا قريت في (المحو) بتعرف المحو؟ قريت في محو الأميّة، والأساس ده تمّيتو في 4 سنين، مازي أساسكم الطويل الممل لحد تامنة و سادسة، أساسي متييييييين وهسي ببني في السطوح. انتوا وصلتوا وين؟

*أها ومربطة الأيام دي؟ قصدي وضعك الاجتماعي شنو حالياً: سنقل، مربّطة، متزوجة ! وضعك شنو؟

#يربّطوك إن شاء الله من إضنيك، يربّطوك للضبح، مالك ومالي هاه ؟ داير ترتبط بي ولا شنو!؟ أجي يا ولادي! شنو الاسئلة العجيبة دي؟ ما ممكن أنا من ساعة ما قعدتا وإنتا بتسألني أسئلة شخصية وغريبة كده! ما ممكن الأسلوب ده.

*معليش يا خالتو، انتي فهمتيني غلط، أنا قصدي إنتي متزوجة!؟

#ما عارفة أقول ليك شنو! لكن آي متزوجة راجلي (عم عبدو) بتاع: ارجع ورا وأبرما أبرما أبرما، تتذكر المقطع بتاع الفيديو ده ؟ طبعاً بقى مشهور شهرة شديدة خلاص، وشعرتا بالغيرة منّوعشان اشتهر قبلي،  طبعاً انا اشتهرتا بعدو بفترة طويلة خلاص بسبب أغنية (محاسن كبّي حرجل)، كنت شغالة ست شاي وعم عبدو كان شغال في المنطقة الصناعية بالخرطوم، والحمد لله الأمور كانت زابطة لحد ما عم عبدو اتوفى، وبقيت أرملة وحيدة (متأثرة وتبكي) ما تذكّرني بالماضي يا ولدي، الماضي ده كان كلّو جراح، زي ما كان بيقول الفنان عمرو دياب الكنت بسمعو بيغنّي من راديو عبّاس بتاع الطعمية، وكان بيقول :

مابلاش نتكلّم في الماضي !

الماضي ده كان كلّو جراح

ومادمت في حبّك أنا راضي

ح ندوّر ليه على شيء راح ! فاهم!؟

*ماهو انتي يا خالتو عاصرة علينا لا بتفهمي اللغة الفصحى ولا بتتكلمي لغتنا بتاعت الشباب، أها، اسي دي قالو مجلة بتاعت شباب، انتي بتعملي هنا شنو؟

#انا ما قلت ليك قبييييل يا ولدي انتا ما بتركّز في كلامي وللا شنو؟ ولا انتا بتسأل أسئلة كده وخلاص!؟ تعال هنا، انتا بقيت صحفي كيف!؟ جابوك بالتمكين هاه!؟

*استهدي بالله يا خالتو! مع… معلـ … معليش! ابردي وما تنفعلي عليك الله، خلينا نتم لقاءنا على خير، خلاص ما فضل كتير.

#خير! يجي من وين وانتوا ما جبتوا لي (كباية مويه) أبل بيها ريقي من ساعة ما جيتكم في مقر المجلة!؟ ريقي نشف في كتر البري والرغي الكتير.

*متأسفين جداً يا خالتو! يادوب جابوا جركانة للكولر بتاع المويه، زي ما عارفة نحنا يادوب بنقول يا هادي، وأمورنا المالية مع الكورونا دي الله عالم بيها، لو ما الشيرنق العملوهو رؤساء التحرير و الكتاب والمصممين ماكنا جبنا الموبايل البنسجل بيهو كلامك ده .

*طيب! نرجع لموضوعنا: ح تقدمي لينا شنو هنا في المجلة دي ؟

# انا ما قلت ليك قبييييل يا ولدي انتا ما بتركّز في كلامي ولا شنو!؟ قلت ليك : الشباب شباب الروح، وانا لو ما لاقية في نفسي “الكفاءة” ولاقية إنو روحي “شبابية” ما كنت جيت المجلة بتاعتكم دي، كنتا مشيت شفت لي مجلة بتاعت خالات ولا حبوبات ولا بتاعت ستّات شاي، أنا جاتني دعوة من رؤساء تحرير المجلة دي، وأنا بتشرّف كتير إني أكون جزء من العقد الفريد ده – مقاطعة لسؤالي القادم – وبعدين تعال هنا ! أنا بعتبر نفسي زولة مخضرمة، أنا زولة عشتا في فترة الستينات، والسبعينات، والتمانينات، لحد هسي دي، وإن شاء الله لحد عمر طويل، انتوا يا جيل التسعينات وجيل الآي باد شفتوا شنو في الماضي بتاعنا ده عشان تتفاصحوا وتعملوا ليكم مجلة؟ منو الأولى يعمل ليهو مجلة!؟ نحنا الناس الولدناكم وسبقناكم ولا انتوا !؟ وبعدين أنا زولة مواكبة ومتطورة فاهم ؟ التكنووجيا والحاجات دي بتخدمني في شغلي على فكرة، الطلبات بتاعت الشاي والقهوة و (الباكمبة) – اسأل منها ناس جامعة النيلين – والحرجل، أنا كلها بستقبلها بالواتساب، وكنتا شغالة جنب صحيفة، وعاملة لي قروب بتاع شاي وكانوا كل الصحفيين بيعملوا طلباتهم فيهو، وانا كنتا الآدمن بتاع القروب، وأي زول ما بسدد لي الدين بتاعو و يتماطل معاي، طوالي بعمل ليهو : بلوك بلوك بلوك ياقول رضوى الشربني، أنا جادة في السوشيال ميديا زي ما أنا جادة بره، ما بجامل وما بضيع زمني فوقو، بزنس إز بزنس زي ما بقولوا الخواجات.

* طيب يا خاتو، ح تقدّمي لينا شنو في المجلة دي !؟

#غير الشاي والقهوة والباكمبا، ح أقدم ليكم كتييييير وكتير، انتوا اصبروا بس، وشيلوا شيلتكم يا ولاد ويا بناتي، إن ما ورّيتكم إنو الجيل القديم ده، أفهم منّكم وأحسن منّكم ما ببقى خالتو محاسن، فاهمين ؟

*عرفتي المجلة من وين؟

#عرفتها في النصيبة الاسمو (فيسبوك) ! جاتني دعوة زيي زي الناس في البداية، ولمن دخلوا صفحتي و شافوا إني زولة مميزة و فريدة من نوعي، ضموني للطاقم بتاع النخبة في قروب الواتساب أنا و ولدي محمد – زي الداخلة لي صفة صندوق بنفرين – ومن يومها وأنا و ولدي ما عندنا سيرة غير المجلة قامت والمجلة قعدت، المهم ! انتظروني وانتظروا مفاجآتي أنا و ولدي في الأيام الجاية.

*استمتعنا باللقاء ده شديد يا خالتو محاسن، والزمن عدى كأنو ثواني في حضرتك، طيب تحبي تختمي اللقاء السمح ده بشنو : كلمة توجهيها للشباب، أو شعر أو أغنية ؟ تحبي تقولي شنو ؟

#الله يسلمك  الله يباركفيك … ليسلمك ليبارك فيك … إلخ .

عندي قصيدة للشباب ! وانا أول واحدة فيهم باعتباري واحدة روحها شباب وكده، بتقول :

أنـــا مش ضعيــــف ولا هستسلم

من اللي جــــرى لــــي أنا هتعلم

أنـــا مش ضعيــــف ولا هستسلم

من اللي جرى لي أنــــا هتــــعلم

بينا إيد في إيـــــد ! ومن جديــــد

نــــبدأ ونــــرضــــي ربــــنـــــا

نفضل شباب! في الخير صحاب

نمشي في طريــــق بـاين ليــــنا

أنــــا طــــول مــــا ربـــنا ويّايا

حــــواليّا نــــاس بتشجّــــعنـــي

ح اتغيــــر انــــا مــــن جوايـــا

عمره الشيطان ما ح يخدعنـــي

بينا إيد في إيـــد  ومن جديــــد

نبــــدأ ونــــرضــــي ربنـــــــا

نفضل شباب في الخير صحاب

نمـــشي فـــي طريــق باين لينا

3 تعليقات
4

3 تعليقات

Avatar
Intrguer_ahmed -

خالتوو محاسن رأيك شنو في الوضع الراهن وما هي الحلول المناسبة عشان نتعدا الأزمات دي؟

Reply
Avatar
محاسن جاد الله عسمان -

شكراً ياخخخخخخخ ????❤
الله يباركك يا قول حبوبتي يا فدوى بتي????❤️

Reply

اترك تعليقا

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. أقبل أقرا المزيد...

Enable Notifications.    Ok No thanks