الرئيسية الأدبشعر وخواطر دايرة أقول ليك

دايرة أقول ليك

بواسطة منال جودة
81 views
شارك اصدقائك
  •  
  •  
  •  
  •  
  •  
  •  
  •  

 

بالمناسبة

دايرة اقول ليك..

النجيمات البشاغلن

فى عيونك لما تضحك

بقربن ليك؟!!                                    

الصباحات

ال بكاونى 

وبشيلن ضيهن من نور جبينك ..

هن معارف؟!!

ولا بس اتشبهن بيك؟..                                          

الغنيوات

البسرقن

ديمه ايقاع ضجتك

فى دمى

يارب كلمنك؟!  

ولا ساااااكت بصدحنْ بيك؟!!                            

غايتو بس بكل صراحة …                         

حقو انت شويه تعقل

وتبتدى تبطل سماحه…

وتعرف إنى

بغير عليك…

                                         

بالمناسبه

دايرة اقول ليك

إنو فيك حاجات غريبه..

فيكا حاجه تشيل حزنا

وتمشي للافراح تجيبا..                  

فيكا حلتنا وشوارع

قالوا ضيقه

وهي بالتحنان رحيـبة..                  

فيك طمي

وريحة جروفنا

ونيمه نديانه ورطيبه…                                           

فيكا حبوبه بتسبح

وتوبا حاضن عنقريبا…                                  

فيكا امى تخش

وتمرق

شايله هم اختى المسافرة

وحالة البيت الصعيبة…                                

فيكا حلمى الكان مدسدس

فى عيون طفله بتذاكر

وتدعي انو الخير نصيبا..      

فيكا حاجات مااابتقدمْ..        

مهما عشعش فى القلوب همْ…                 

برضو هى بتفضل قريبه..                    

وتانى لي روحك توديك… 

                             

بالمناسبه

دايره اقول ليك….          

دايرة اقول ليك واسآئلك

إنت عارف أحلي مافيك؟                 

أحلي مافيك

إنت كلك…       

اصلي مابقدر اقرر

أجمل الياسمين فى قلبك

ولا اجمل منو فلك؟..                                     

أحلي جنك ولا عقلك؟!…                   

أشهى صدك ولا وصلك؟!!..       

أرقى احساسك وذوقك ولا اصلك؟!!…                                 

أطعم الود فى ابتسامك؟!!

ولا أطعم منو عسلك؟!!                       

أحلي لما تحن وترضى؟!

ولايارب احلي زعلك..

 كلووووو أحلي…                                  

وإنت يامحبوبنا فايز

ديمه بالقدح المعلَّي..  

 في علاك

مين اللي بيصلك!!                         

ومافى زيك الا انت!!

وما بشابهك حتى ضلك…

وحتى ضلك…

ماشي جنبك ومشتهيك!!

وبالمناسبه دايرة اقول ليك…                            

دايرة أقول بكل صراحه ….

حقو انت شويه تعقل

تبتدى تبطل سماحه

 وتعرف إنى بغير عليك..

 

هيام الاسد

ربما يعجبك أيضا

اترك تعليقا

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. أقبل أقرا المزيد...