الرئيسية الأدبشعر وخواطر فلنَفْــــــــرِض

فلنَفْــــــــرِض

بواسطة هيام الأسد
147 مشاهدات

فلنفرض حبيتك جدا

تتخيل يا غالي كفايه

وهو كيف ح يعيش الحب والريد

في وش الدنيا القسايه

وعصفور الحب كيف بيقدر يطير

ما دام حكم الظرف القاسي اصلا معروف غاوي رمايه

ولنفرض حبيتك جدا

ودا حاصل. بس ما تكلم زول

خلي الاحزان ياخي يعدن

ما حال الدنيا بتتلاعب بقلوبنا دوام جزرا ومدا

والعايش فيها بيلاقي كتير

كل يوم آهات ما بتعدن

وانا كان مفروض القاك ابدر

او اصلا في عالم تاني..

في عالم فيهو تكون انسان..بكل المعني الانساني..

ما هنا ما بين من وين؟

ود مين

وتاريخ الجد السابع ليك من عند العصر العثماني

بيضيع احساس بيشبهنا شديد لايوم القاك لا بتلقاني..

بس تعرف برغم الحاصل

وبكل تفاصيلا الصعبه

احساس الغربه.. وظلم الغير

في وسط الناس طعم الغربه..

انا لو بدلت العمر قصاد بس لحظه معاك ..

صدقني العمر بكون حبه..

هو ايه في الدنيا بحلي العيش

الا قلوب مليانه محبه..

ولنفرض

حبيتك جداً..

ربما يعجبك أيضا

اترك تعليقا