الرئيسية الأدبشعر وخواطر نفاج الروح

نفاج الروح

بواسطة هيام الأسد
824 views
شارك اصدقائك
  •  
  •  
  •  
  •  
  •  
  •  
  •  

يازول وينك؟

حرستك قبل شوية الشوق ورجعت لقيت بس ياسمينك…

بي وين غادرتني يامجنون وأنا ريدة حبستك في الأعماق قفلت جميع أبواب بينك…

يازول اللحظه معاكا عمر بتمد بيناتنا اللهفه طريق..

يتجارو عليهو صغار الشوق ويخلو الفرح الغافي يفيق..

بتفرح وإنت معاي العيد وتضيف لي كل لحظاتي بريق..

ومعاكا ولا هماني عذاب بتبسم مهما الواسعه تضيق..

وتتاوق من نفاج الروح تتسارق زي رقراق الضي..

وتحرش جوايا الإحساس تتآمر وكل حواسي علي..

وأنا بفرح جدا” لما تكون.. جواي بتشكل تاني الكون..

تديهو الطعم الحس اللون وألقاها تشوف شوفك عيني..

وأنا جد محتاجه أدسك شان جوايا تخربش لسه كمان

ترسمني نجيمة وشجرة فل..نخلاية وورده وغيمة ري..

ونسة حبوبه وقعدة شاي وطهارة قلب موحد وحي..

وأنا ياخي بأمنك الإحساس

أمنتك يارائع عينيك..

حرستك كل نقاط الضو المنك سطعت وكل ماأروح من تاني تجيب الخطوة عليك..

حلفتك يازول مهما تغيب مايفارق درب الرجعه عليك..

ماتشحتف بي لقياك الروح وتشبك طفل الإحساس بيك..

راجياكا علي شرفات البوح بنده ياغالي وأنادي عليك..

يازول وينك؟!

حرستك قبل شوية الروح ورجعت لقيت بس ياسمينك..

بي وين غادرتني يامجنون

وأنا ريده حبستك في الأعماق قفلت جميع أبواب بينك..
:
:
يازول وينك ؟؟؟

هيام الاسد

ربما يعجبك أيضا

اترك تعليقا

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. أقبل أقرا المزيد...