الرئيسية الأدبشعر وخواطر تعالْ

تعالْ

بواسطة هيام الأسد
141 views
شارك اصدقائك
  •  
  •  
  •  
  •  
  •  
  •  
  •  

تعالْ..
تعالْ..أتوَنَّسَك جواكْ
و أضم ايد اشتياقي عليك..
ونتماسكْ
نساسقْ في دريبات العشم بينا
يصبْ غيم الحنان الفيك..
ونتسابقْ
يكون الميس حدود نبضك..
نجي الأولْ
ويكون أحلي الهدايا مجيكْ..

تعال نسرحْ
مع النسماتْ
نخش كل بيت نزيدو براحْ…
تعال نفرح ْ
مع الأطفال
نفتش لي شليلنا الراحْ..
تعال نصبحْ
إجابه صحيحه
في زمنا غباهو الصاحْ..
تعال نكدحْ
مع كل زولْ
بقوم من الصباح يمرقْ
يجيب اللقمة هم وعرقْ
وينوم رغم التعب مرتاح…

تعال أنا داسة ليك العيد..
صباح العيد ..
ولون العيد..
وتكبيرو الصباحية ..
براءة طفلة لابسة جديد..
أبوها اداها عيدية ..
بتدخل بيت..
تفارق بيت
فرح والدمعة منسية ..
تعالْ
أنا داسة ليك الريدْ
وشمعات الوداد حية ..
تعال أبنيلي جواك
بيتْ
وطنْ بي كلْ سَمِح
عمرانْ..
وطن يقراهو طفلي
نشيد
يرتلو سوره في القرآن..
وطن ماتموت عصافيرو
وخيرو
بتخطفو الغربانْ..
وطن
في حضنو مابتجوع
وغيرك
بالشبع عيَّانْ..
وطن لي
كُل زول فينا..
وطن حق
كل زول فينا..
بدون قبلية
لا عصبية
لا ألوانْ..
وطن انسانْ..
وأظنو نِدايا
ليكَ وصلْ
وأظنك
مابتدور عنوانْ
لأني قريـــــبة
بسكن فيك
وفي كل زولْ
ملامحو بتشبه السودان

ربما يعجبك أيضا

اترك تعليقا

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. أقبل أقرا المزيد...