اشتقت ليك عدد الرمال عدد النجيمات في السماء
عدد الحروف عدد المدايح والغناء
اشتقت ليك وأنا عارفه إنك ماهنا
عايش بعيد عن دنيتي فرحان وحالك في الهناء
وأنا تايهة بعدك يا جناي الدنيا بعدك ما دنا
عايشاك في دنيا الخيال راسماك في خاطر المنا
بتمني جيتك بالشهور أشيل في صورتك وأحضنا
وآمالي أدخل في قليبك مدن عواطفك أسكنا
تسكن دواخلي وتبقي فيني مهجة واحده تضمنا
تحميني من جور الزمن تحفظ رويحتي تأمنا
يحفظنا ربنا بي سلام والقاسيه الله يهونا
وأنا لسه برضه في شوقي ليك
شوق الأمومة وقت تكون فاقده الجني
شوق الفراش لي زهرة تهديه الرحيق
شوق الفقير للراحه في ضل الغنا
شوق نجيمات يونسن القمر يحكوا له يومي بحبنا
يدعوا بفرحنا وقربنا في عش علي سطح القمر يفرح معانا يعزنا
أو حتي في غصن الشجر يسترنا بس ويلمنا
نفرح وننعم بالوصال يتلم بالخير شملنا
نكبر ويكبر حبنا والريده تسكن حينا
عنوانه بس أنت وأنا خليها بس لي ربنا
هادية سليمان
