سكة ريد

بواسطة مجلة السودان
200 مشاهدات

شعر أحمد الجنداوي

توّهت قلبي الراد عيونك
وشال ملامحك لي زواده
سكة الريد يوم مشيتا
قلت ما داير إعاده

مناي أبقى دوام جوارك
لي صفاك ممكون زياده
ديمه بطراك في منامي
وللعمير مكتوب شهاده

ساهي إنت ولامبالي
العذاب أصبح لي عاده
والحزن معطون جوايا
والمآسي بلا هواده

مالو لو صافيتني مرّه
بدلت للآهات سعاده
العوازل ياما شمتو
والألم لملم حصاده

كان بشيشك أو أقلو
الصبر مكتوب عباده
والأيام من غير عيونك
كل شي يبقالي ساده

النسيم ماعاد يوشوش
ولا الخميل ميّل وساده
ولا الغنيوات أطربني
واي لحظه جميله شارده

كل عزاي إني البريدك
العيون يشكن سهاده
وليه قساوتك ياالحِنيِّن
من جفاك عيوني وارده

وكلما طيفك يزورني
أو خيالك مره نادى
أشقى في صهوة خيولي
وإنت ماعارف ميعاده

وديمه عينيك يلهمني
نسعد الدنيا ووهاده
نشقى نتعذب لغيرنا
شمعه ما نالت مراده

 

ربما يعجبك أيضا

اترك تعليقا

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. أقبل أقرا المزيد...