فلنفرض

فلنفْرضْ
حبيتك جداً..
تتخيلْ يا غالي كفايه؟!!..
وهو كيف ح يعيش الحبْ والريدْ
في وش الدنيا القسايه؟؟..
وعصفور الحب كيف بيقدر يطير؟!!
ما دام حكمْ الظرف القاسي..
أصلا معروف غاوي رمايه..

ولنفرض حبيتك جداً..
ودا حاصل..
بس ما تكلم زول..
خلي الاحزان ياخي يعدنْ..
ما حال الدنيا بتتلاعبْ
بقلوبنا دوام جزرا ومداً..
والعايش فيها بيلاقي كتير
كل يوم آهات ما بتعدنْ..

وأنا كان مفروض ألقاك أبدرْ..
او أصلا في عالم تاني..
في عالم فيهو تكون انسان
بكل المعني الإنساني..
شان هنا
ما بين من وين؟؟
ود مين؟؟
وتاريخ الجد السابع ليك
من عند العصر العثماني ..
بيضيع إحساس
بيشبهنا شديد
لايوم ألقاك
لا بتلقاني..

بس تعرف
برغم الحاصل
وبكل تفاصيلنا الصعبة..
إحساس الوِحدة..
وظلم الغير..
في وسط الناس طعم الغربه..
أنا لو بدلت العمرِ قصاد بسْ
لحظه معاك ..
صدقني العمر بكون حبه..
هو إيه في الدنيا بحلي العيش
إلا قلوب عمرانه محبه..

هيام الاسد